🥣 BB 輔食餐盤萬用配搭公式
好多媽咪一諗到「一餐要點配」，就開始有壓力。
其實輔食冇想像中咁複雜，只要記住一個基本原則就夠👇

👉 優質碳水 ＋ 優質蛋白 ＋ 蔬果（維生素） ＋ 健康脂肪
同時留意 含鐵食物 嘅攝取，就已經好全面。

唔需要每一餐都齊晒四大類，
但 一日之內、甚至一星期內有覆蓋到就可以。

🌱 飲食小重點
• 每餐唔一定齊晒，但 一日內應涵蓋唔同食物種類
• 建議 每日接觸約 10–12 種食材，一星期約 25 種左右
• 提供肉類時，可以配合 含維他命 C 嘅蔬果（例如番茄、菜心、南瓜），有助吸收鐵質
• 月齡較細都可以慢慢鼓勵 手抓食物，培養進食興趣
• 讓 BB 多試唔同味道，接觸得愈多，將來接受新食物嘅能力就愈高

🍽 進食態度都好重要
• BB 有權唔食佢唔鍾意嘅食物，唔好逼
• 避免令 BB 對新食物產生不安或抗拒
• 自主進食嘅 BB 會按自己節奏食，記得 尊重飽足訊號

💛 最後想同媽咪講
餐盤配搭嘅原則係死嘅，但 BB 同家庭係活嘅。
只要掌握基本方向，再配合自己屋企嘅飲食習慣，
每個 BB 嘅餐盤都可以係獨一無二。

唔好同人比較，
人哋 BB 嘅餐盤再靚，都未必適合你屋企。
想 BB 食得健康、多元，其實由家庭飲食慢慢做起就夠。

同時，媽咪都唔好俾自己太大壓力。
一餐食得求其，下餐再調整就好。
我哋唔係煮一兩餐，係要煮好多好多餐 😂
放過自己，已經做得好好啦。